မြူတွေဆိုင်းပြီး
လှချင်တိုင်းလှနေတဲ့
ဒေါနတောင်ခြေ ရွာငယ်လေးက
အသက်အငယ်ငယ်နဲ့ သူပုန်ဖြစ်ခဲ့ရတဲ့ ကျနော်
ဘ၀ပေးအသိနဲ့
တော်လှန်သူတွေကို ချစ်တယ်
တော်လှန်ရေးကြီးကို ချစ်ခဲ့တယ်။
မသိစိတ်မှာ ကြောက်စိတ်တွေသာ ကြီးစိုးပေမယ့်
သိစိတ်မှာ တစစီကြေမွသွားအောင် … ။
မိုးတည
တောင်ယာတဲဝမှာ
အရိပ်မဲတွေ ထိုးကျခဲ့တယ်
အပါးကို သွေးစိမ်းရှင်ရှင်ကျ အသားတွေ အထပ်ထပ်မွန်း
အမိုးကို ဘက်နက်ပြ အလှည့်ကျ စနစ်နဲ့ …
ကျနော်ကျတော့ ရှင်လျှက်နဲ့ သေခဲ့ရပေါ့။
တကောင်ကြွက်
အဖော်မဲ့ဘ၀ ဖြစ်အောင်
အိပ်မက်နဲ့ အတွေးတွေကြား
တုန်လှုပ်ခြောက်ခြားနေရအောင်
ဝတ်စုံတွေမြင်တိုင်း
ပုန်းအောင်းနေတတ်အောင်
သေနတ်နဲ့ ဘက်နက်မြင်တိုင်း
သွေးပျက်ထိတ်လန့်နေရအောင်
ရူးသွပ်သူ တစုက
ကျနော့်ငယ်ဘ၀ကို
မညှာမတာ ချေမွခဲ့ကြတယ်။
တသသ
အမှတ်တရ ပန်းချီကား
အမိုးနဲ့အပါး အချစ်ဆုံးသား ကျနော်
အဖော်က မိုးမခ
ဒေါနတောင်တန်းကြီးနဲ့
မြူတလှည့် မိုးတလှည့်
စိုလက်နေတဲ့ တောင်ယာတွေ
တံပိုးသံနဲ့ ရိုးရာတေး
ကျောက်ဆောင်ကြားက ငါးလေးတွေ
သစ်သီးတွေစား လှည့်စားတတ်တဲ့ ရှဥ့်ငယ်တွေ
တတောလုံးမွေး တတောင်လုံးသင်း
ပွင့်ချင်တိုင်းပွင့်နေတဲ့ ပန်းရိုင်းတွေ
တခါတခါ ပြည့်ပြည့်၀၀
တခါတခါလည်း မပြည့်မ၀
ဒါပေမယ့်
အမြဲတမ်းရှင်းသန့်နေတဲ့ လရောင်တွေ
ကျနော် …
သူတို့နဲ့ဘဲ ပျော်ခဲ့ရတယ်။
တောင်ယာတွေကို သိပ်ချစ်လို့
သူပုန်ဖြစ်ခဲ့ရသူဆိုရင်
သင်တိုင်းဖြူမက လွဲလို့ …
ကျနော်ကတော့
တော်လှန်သူဘ၀ကို
နောက်ဆုံးထွက်သက်ထိ ချစ်နေပါဦးမယ်။ ။
ခိုင်မာကျော်ဇော
No comments:
Post a Comment
အခုလို လာရောက်အားပေးကြတာ အထူးပဲ ၀မ်းသာ ပီတိဖြစ်ရပါတယ်ဗျား ... ။ကျေးဇူးအထူးတင်ပါတယ်။
ကျော်ထက်ဝင်း နည်းပညာ (ဘားအံ)
www.kyawhtetwin.blogspot.com